Buy and sell 3d printer files
"كنيسة واحدة" كلمة قلبت الدنيا وبقت رد على اى مزنق تتزنق فيه يا صديقى الأنجيلى .
أنا أسف يا صديقى الأنجيلى بس انت " بتسطعبطنى"
اه بتسطعبطنى يا صديقى ممكن تقولى انت ليه بتقول عليا انا وانت كنيسة واحده . والأدهى عايزنى اصدقك طيب اصدقك ازاى ومنين اذا كنت انت مش مصدق نفسك ؟؟
مااااااشى يا سيدى انا هامشى معاك وهاصدقك انت محب للموضوع ده ومؤمن بيه وانا بحاول اخرب عليك فرحتك بالموضوع ده وافتت وحدة الكنيسة علشان انت احسن منى .. بس فى حاجة بقى يا صديقى الأنجيلى
انا زمان وانا صغير ولا بس شورط كانو بيودونى حاجة كده اسمها "مدارس الأحد" كنت بتعلم "أساسيات الأرثوذكسية السلفية " زى مانت بتقول يعنى. بس يا سيدى هما هناك كانو بيقولونا الكلمة دة كنيسة واحده وجسد واحد فى المسيح .. بس على أيامنا كان المفهوم ان أنا ممكن اروح أى كنيسة أصلى فيها وأتناول فيها وربنا يسمعنى علشان الكنيسة كنيسة واحده ... والغريب يا صديقى الأنجيلى أنك كنت تلاقى أبونا فلان ممكن يروح يصلى مع أبونا فلان فى كنيستة عادى تخيل يا صديقى والأغرب بقى أن ممكن تلاقى العكس بيحصل وتلاقى أبونا فولان التانى راح لأبونا فولان الأولانى وصلى معاه فى كنيسة تانية .. ماهى هى دى الوحده اللى انا اعرفها اللى مافيهاش فرق فى أى حاجة... زى ماتقول كده يا صديقى الأنجيلى اللى هنا هاتلاقيه هناك..
تعالى انت بقى يا صديقى الأنجيلى عرفنى على وحدتك اللى انت عايز تعملها ... شئ غريب ... (بخلفية موسيقية كده لموسيقى برنامج العلم والإيمان).. شوف انت عايز تعمل ايه انت عايز تخلى الكنيسة الأرثذوكسية اللى هى اصلا كنيسة واحده من قبل ما اسمع عنك يا صديقى الأنجيلى .. والكنيسة الأنجلية وباقى الطوائف.. اللى هى اصلا مافيش بنها وبين عقيدتى اى شبة أو أى وجه شبه وتقوم قايل عليهم كلهم كنيسة واحده.. صدقنى حلو انا موافق على الموضوع ده بس الكلام ده مايجيش جهجهونى كده يا صديقى الأنجيلى ... ماهو لو كده قادة الكنايس دى تتجمع فى مجمع وتقول فين الإيمان الصحيح اللى احنا كلنا هانتوحد فيه علشان لما اجى عندك ماحسش ان انا فى حتة غريبة عليا.. مع العلم ان ده مش هايحصل ابدا علشان انت معندكش استعداد تصدقنى وانا اصلا مش مصدقك..
تعالى بقى نتكلم فى الوحدة التفصيل اللى انت عملتها أنت قولتلى لا سيبك من العقد دى الحياة بسيطة خالص انت هاتيجى تصلى معايا بطريقتى هانرنم وهانتنطط وهانسقف وممكن نرقص لو عايز وهانتبسط يا سيدى تعالى وجرب .. وللأسف فى اللى راحلك وجرب وانت اتبسط وبسط اللى راح والناس دى ابتدت تكتر وابتدى انبساطك ده يكتر...قولت بس شوفت الموضوع حلو ازاى تعالى اتناول عندى بقى عادى احنا مش هانطول عليك هى كلها ربع ساعة هانقعد نعمل مائدة وهانمشى.. وبرضه فى ناس عملت كده برضه وكترو كمان وانت اتبسطت.. طيب ايه يا صديقى الأنجيلى أنت نسيت ولا ايه ..احنا كنيسة واحده .. هاتقولاى بالفم المليان طبعاااااااً مانت بتيجى عندى اهو هو ده مش دليل.. حيلك حيلك عليا يا عم الأنجيلى انت هاتستعبطنى بقى .. طيب هو انت عندك كنيسة وانا عندى 128 حمرا.. مانا كمان عندى كنيسة وكهنة وقداس تعالى صلى معايا بقى..تجى انت تقولى لالا مش هاينفع يا ابنى انا صح .. انا بقلد المسيح فى التناول وانت لا.. خلاص ياعم انا ولا هاتناول عندك ولا تتناول عندى خالصين ياعم الأنجيلى .. بس انا هاجيلك وانت تجيلى وانا أول ما هاشوف القس فلان عندك هاسلم علية واحترمة علشان ده رمز من رموز كنيستك...وانت برضه لما تيجى عندى هاتلاقى ابونا فلان ابقى سلم غلية . اه اه ابقى بوس على الصليب وعلى ايده أحنا بنعمل كدهه علشان هو بيمثل السيد المسيح على الأرض واحنا بنحبة اوى .. تيجى قايلى بس يا اهبل انت بتصدق الكلام ده دانتو مضحوك عليكو مين اللى بيمثل المسيح انت يابنى مابتشفش ده بيعمل ايه انت فاكر انه بيصعد بس يالا وطبعاً تلاقيه باخد منك العشور مانت اهبل سألته بيعمل بيها ايه ياعم اجرى كده انت مش عارف حاجة وبعدين ابوس على ايده ليه مانا زى زيه وممكن أكون انا احسن منه بأعمالى انت ايه عرفك . بس عندك يا صديقى الأنجيلى مالكش دعوة بالكهنوت ده رمز عقيدتى الكهنوت ده محدش يستاهل ترابة ... الكهنوت ده الصورة الصح لحياة السيد المسيح على الأرض .. زى ماتقال عن السيد المسيح انه كان يجول يصنع خير ...ونص الأيه "الَّذِي جَالَ يَصْنَعُ خَيْرًا" (سفر أعمال الرسل 10: 38). تمام زى الكاهن الأرثوذكسى بيجول علشان يصنع الخير دى مشكلتك انت ان انت ماتعرفش حاجة عن الكهنوت ده حتى لما بيبدأ خدمتة بيقعد فى الدير 40 يوم متواصلة صيام وصلاه وبيكونو فى الصيام الكبير .. زى ما السيد المسيح صام قبل مايبدأ خدمته .. ولا انت ماتعرفش الصيام الكبير طيب لما انت بتقلد المسيح فى المناولة ماقلدتوش ليه فى الصيام ولا انت بتنقى السهل بس؟؟
معلش بقى ماتغلطش فى الكهنوت وانا مش هاحتك اصلا بالقسيس بتاعك ولا عايز اشوفة ولو شفته مش هاسلم علية .. ليه عايزنى احترمة وانت مش عايز تحترم كهنوتى ورمز عقيدتى.
بيتهيقلى مافيش داعى تيجى عندى اصلا وانا مش حابب اجى عندك لانت بتحترمنى ولا عايز تحترم كنيستى ولا عايز تتناول عندى .. طيب انا اجى عندك ليه
اه انت كنت بتقول كنيسة واحدة .. كفاية استعباط بقى ماتستعبطنيش زيادة عن كده مش علشان عايز تنجح مؤتمر تقول كنيسة واحده علاشن يجيلك من كل الطوائف
مافيش كنيسة واحدة مابين الطوائف وكل اللى انت بتقولة واللى هاتقولة ماعو إلا أكاذيب .. انت تصدقها ماشى انما انا لا..
أنا بقول تخليك فى نفسك ومالكش دعوة بيا ولا بكنيستى .. طالما انت مش قادر تثبتلى صحة إيمانك ماتعكش وتغلط فى إيمانى . :)
بس على فكرة أحنا مش كنيسة واحد اه ومش هاجى عندك اه بس أنت برضه هاتفضل صديقى الأنجيلى هانتقايل فى الشرع وهاسلم عيك وهانعمل كل حاجة سوا إلا ان انا وانت نتجمع فى حاجة تخص الإيمان ... :)
بس على فكرة أحنا مش كنيسة واحد اه ومش هاجى عندك اه بس أنت برضه هاتفضل صديقى الأنجيلى هانتقايل فى الشرع وهاسلم عيك وهانعمل كل حاجة سوا إلا ان انا وانت نتجمع فى حاجة تخص الإيمان ... :)
طبعا كلامى انا وانت مش هايخلص بس هانتقابل تانى أكيد .,,